Ətirlər haqqında bilməli olduğunuz 6 vacib məqam

Ətir seçmək sadəcə xoş qoxunu bəyənməkdən ibarət deyil. Dəri tipi, bədən temperaturu, ətrin tətbiq olunduğu nahiyə və saxlanma şəraiti onun necə hiss olunmasına və nə qədər qalıcı olmasına təsir edir.

Bəs dəriyə uyğun ətri necə seçmək, ətiri hara vurmaq və onu necə düzgün saxlamaq lazımdır? Ətir istifadəsi ilə bağlı bilməli olduğunuz əsas məqamları bir araya topladıq.

Dəri tipinizə uyğun ətri necə seçmək olar?

Eyni ətir hər kəsdə eyni qoxmur. Bunun əsas səbəbi hər insanın fərqli bədən kimyasına sahib olmasıdır.

Ətrin dərinizdə necə açılmasına bir neçə amil təsir edir:

Dəri tipi

Dərinin yağlılıq səviyyəsi ətrin qalıcı olmasına təsir göstərir. Yağlı dəridə ətir adətən daha uzun müddət qalır. Quru dəridə isə qoxu daha tez zəifləyə bilər.

Quru dəriniz varsa, ətirdən əvvəl qoxusuz nəmləndirici istifadə etmək ətrin dəridə daha yaxşı qalmasına kömək edə bilər.

Dərinin pH səviyyəsi

Hər insanın dərisinin özünəməxsus pH səviyyəsi var. Bu göstərici də ətrin notlarının dəridə necə hiss olunmasına təsir edə bilər.

Məhz buna görə bir insanda daha şirin hiss olunan ətir digərində daha odunsu və ya ədviyyatlı açıla bilər.

Bədən temperaturu

İsti hava və yüksək bədən temperaturu ətrin daha tez yayılmasına səbəb olur. Buna görə eyni ətir yay aylarında daha intensiv, soyuq havalarda isə daha yumşaq hiss oluna bilər.

Ətiri almadan əvvəl necə test etmək lazımdır?

Əvvəlcə ətri test kağızına sıxaraq üst notları yoxlayın.

Bəyəndiyiniz ətri daha sonra biləyinizə tətbiq edin və bir qədər gözləyin:

• ilk dəqiqələrdə üst notlar,
• təxminən 15–30 dəqiqə sonra orta notlar,
• bir neçə saat ərzində isə əsas notlar hiss olunmağa başlayır.

Ətir əsas notlar açıldıqdan sonra da xoşunuza gəlirsə, sizin üçün uyğun seçim ola bilər.

2. Ətirdən düzgün istifadə etmək üçün nə etmək lazımdır?

Ətrin daha yaxşı hiss olunması və qalıcı olması üçün onu düzgün tətbiq etmək vacibdir.

Ətri birbaşa dəriyə tətbiq edin

Ətir dəridə bədən temperaturu ilə təmas etdikcə tədricən açılır və fərqli notlarını göstərir.

Nəbz nöqtələrinə üstünlük verin

Bədənin daha isti nahiyələri ətrin yayılmasına kömək edir. Bilək, boyun və dirsəyin iç hissəsi ən çox istifadə olunan bölgələrdəndir.

Ətri saçınıza birbaşa sıxmayın

Ətirlərin əksəriyyətində spirt olduğu üçün məhsulu tez-tez birbaşa saça tətbiq etmək saçın qurumasına səbəb ola bilər.

3. Ətir bədənin harasına vurulmalıdır?

Ətir üçün ən uyğun bölgələr nəbz nöqtələri hesab olunur.

Bunlar qan damarlarının dəriyə daha yaxın yerləşdiyi və bədən temperaturunun daha çox hiss olunduğu nahiyələrdir.

Ətiri aşağıdakı bölgələrə tətbiq edə bilərsiniz:

• biləklərin iç hissəsi;
• boyun;
• qulaq arxası;
• dekolte nahiyəsi;
• dirsəklərin iç hissəsi;
• dizlərin arxası.

Ətri biləklərə vurduqdan sonra onları bir-birinə sürtməmək daha yaxşıdır. Bu, ətrin təbii şəkildə açılmasına imkan verir.

4. Ətiri necə düzgün saxlamaq lazımdır?

Ətrin saxlanma şəraiti onun keyfiyyətinə və qoxusunun dəyişmədən qalmasına birbaşa təsir edir.

Ətirləri:

• birbaşa günəş işığından uzaqda;
• sərin yerdə;
• temperaturun tez-tez dəyişmədiyi məkanda;
• yüksək rütubətdən uzaqda saxlamaq məsləhətdir.

Ətiri hamam otağında saxlamaq olarmı?

Hamam otağı ətirlər üçün ideal yer deyil. Buradakı yüksək rütubət və tez-tez dəyişən temperatur zamanla ətrin tərkibinə təsir edə bilər.

Ən yaxşı seçim ətri yataq otağındakı dolabda və ya günəş işığı düşməyən başqa sərin məkanda saxlamaqdır.

Qısaca, ətirinizi sərin, qaranlıq və quru yerdə saxlayın.

5. Niyə eyni ətir hər kəsdə fərqli qoxur?

Bəzən başqa bir insanda çox bəyəndiyiniz ətir sizin dərinizdə tamamilə fərqli hiss oluna bilər.

Bu, normaldır.

Ətrin açılmasına aşağıdakılar təsir edir:

• dəri tipi;
• dərinin yağlılıq səviyyəsi;
• pH göstəricisi;
• bədən temperaturu;
• hava şəraiti.

Bu səbəbdən ətri yalnız test kağızında deyil, öz dərinizdə də sınamaq vacibdir.

Ətir seçərkən ilk təəssürata deyil, onun bir neçə saat sonra dərinizdə necə hiss olunduğuna da diqqət edin.

6. Ətrin istifadə müddəti nə qədərdir?

Ətirlər düzgün şəraitdə uzun müddət istifadə oluna bilər. Ümumiyyətlə, bir çox ətirin orta saxlanma müddəti təxminən 3–5 il hesab olunur.

Flakon açılmayıbsa və düzgün saxlanılıbsa, bu müddət daha uzun ola bilər.

Ətrin keyfiyyətinin dəyişdiyini göstərən əsas əlamətlər bunlardır:

• əvvəlkindən fərqli və xoşagəlməz qoxu;
• rəngdə nəzərəçarpacaq dəyişiklik;
• məhsulun quruluşunda dəyişiklik.

Belə hallarda ətri istifadə etməmək daha məqsədəuyğundur.

Doğru ətir seçimi şəxsi təcrübədir

Ətir dəridə yaşayan və zamanla dəyişən bir kompozisiyadır. Buna görə ətri seçərkən yalnız ilk notlara deyil, onun dərinizdə necə açıldığına və gün ərzində necə dəyişdiyinə diqqət etmək vacibdir.

Odour kolleksiyasında fərqli qoxu ailələrinə və xarakterlərə uyğun ətirləri kəşf edə, sizə ən uyğun qoxunu seçə bilərsiniz.